Моладзевы цэнтр “Панямонцы” YMCA Беларусі можа стаць пляцоўкай для правядзення летнікаў, мастацкіх пленэраў, фестываляў ды іншых мерапрыемстваў. Перспектывы супрацоўніцтва па новых кірунках абмеркавалі ўдзельнікі круглага стала, які прайшоў у вёсцы Панямонцы Лідскага раёна.
У моладзевым цэнтры сустрэліся мастакі, прадстаўнікі грамадскіх аб’яднанняў і дзяржаўных устаноў, іншыя. Яны пазнаёміліся з гісторыяй стварэння і развіцця гэтага цэнтра, яго інфраструктурай, “партфоліо” ранейшых мерапрыемстваў.
— Вельмі прыемна, што ўдзельнікі круглага стала зацікавіліся магчымасцямі “Панямонцаў”, — падзяліўся ўражаннямі генеральны сакратар YMCA Беларусі (грамадскай арганізацыі “Хрысціянская садружнасць дарослых і маладых”) Аляксандр Драчук. — Яны выказалі шмат перспектыўных ідэй. Напрыклад, аб магчымасці ладзіць на базе моладзевага цэнтра пленэры, фестывалі. Былі таксама іншыя прапановы. Мы іх разам абмяркуем і паспрабуем ажыццявіць.
На круглым стале таксама прэзентавалі трэнінг “Асновы прадпрымальніцтва і самазанятасці дарослага насельніцтва”, які плануецца правесці ў моладзевым цэнтры “Панямонцы” напрыканцы жніўня. Але яшчэ дагэтуль на беразе Нёмана адбудзецца некалькі важных сустрэч, насычаных ведамі і эмоцыямі. Напрыклад, у чэрвені пройдзе летнік з удзелам старшакласнікаў Лідскага раёна, а на 21-29 ліпеня запланаваны летнік актыўнай грамадзянскасці “Усе разам-2018”.
Руслан Ананьеў
Фота Аляксандра Драчука
