Некалькі дзясяткаў самых цёплых і папулярных песень, якія сталі хітамі летнікаў YMCA Беларусь, надрукуюць у зборніку.
Беларуска- і рускамоўныя тэксты змесцяць не толькі на кірыліцы, але і на лацінцы. Так зробяць спецыяльна для замежных сяброў. Магчыма, будуць песні на англійскай, нямецкай, іншай мове. Да тэкстаў дададуць гітарныя акорды.
— Ідэю стварэння такога зборніка выказвалі і раней, — гаворыць адзін з лідэраў YMCA Мінск Яўгенія Сядова, якой даручылі сабраць песні. — Рэгулярна, калі мы пачыналі падчас летніка пець ля вогнішча, наша фантазія вычарпалася пасля дзесятага хіта. І мы пачыналі піхаць адзін аднаго ў бокі: ну, што яшчэ?
Дагэтуль ў мінскім ды некаторых іншых лакальных аддзяленнях арганізацыі друкавалі свае песеннікі. Але іх выдавалі невялікім накладам, яны не “ішлі ў народ”.
— Мы заклікалі прадстаўнікоў усіх сямі лакальных аддзяленняў даслаць тэксты з акордамі, — адзначае Яўгенія. — Вельмі цешыць тое, што валанцёры адгукнуліся.
Пасля збору інфармацыі прадстаўнікі нацыянальнага савета YMCA Беларусь разам з самымі “музычна-вакальнымі” валанцёрамі выбяруць найбольш папулярныя і найбольш запатрабаваныя. Сфарміраваны зборнік падрыхтуюць у двух варыянтах: папяровым і электронным.
— Зразумела, што ў кожнага свае любімыя песні, — разважае Яўгенія. — Напрыклад, тры маіх хіта з “рэпертуару” YMCA Беларусь — “Дзе мой край” Зміцера Вайцюшкевіча, “Лететь” (гурт “Амега”), “One of us” (Joan Osborne). Але з дасланай нам інфармацыі трэба будзе выбраць тыя, якія падабаюцца ўсім.
На яе думку, хутчэй за ўсё ў зборніку павінна быць не 20 песень, а 50 ці нават больш. Але калі рэпертуар будзе занадта шырокім, дык і зборнік атрымаецца вялікім, цяжкім. І такі фаліянт часцей будзе стаяць на паліцы ў кватэры, чым падарожнічаць у заплечніку на летнікі. З гэтай прычыны “конкурснай камісіі” пры разглядзе песень-прэтэндэнтаў давядзецца шукаць узважаны баланс багацця рэпертуару і зручнасці надрукаванага песенніка.
Ініцыятары выдання зборніка абяцаюць паклапаціцца і аб высокай якасці паліграфіі. Важна, каб зборнік не разваліўся на часткі ў першы ж сезон, а праслужыў некалькі гадоў.
Абавязкова ў зборнік плануюць уключыць і тыя песні, якія нарадзіліся падчас летнікаў у Панямонцах ці на іншых сустрэчах, і сталі папулярнымі.
Руслан Ананьеў
