Больш за дваццаць валанцёраў з розных куткоў Беларусі ў Моладзевым цэнтры на беразе Нёмана працягнулі рамонт былой вясковай школ і знайшлі час для вясёлых гульняў і філасофскіх разваг.
Валанцёрскі дэсант, які высадзіўся ў Панямонцах у апошнія выходныя вясны, стаў за сёлетні сезон самым масавым і прадуктыўным.
— Валанцёры прыбралі падворак, рнопнеслі старыя дошкі і цэглу, — распавёў лідэр YMCA Маладзечна Дзмітрый Ваховіч (Дзіп). — Акрамя таго, вызвалілі вялікі пакой ад будаўнічага смецця, пачысцілі і выклалі цэнтральнае вогнішча. Хлопцы выкапалі траншэю для электрычных камунікацый. Дзяўчаты натузалі тры кіло старых цвікоў. Будаўнікі тым часам перакрывалі дах, займаліся ўнутраным аздабленнем пакояў.
Па яго словах, ужо стала традыцыяй, што Панямонцы збіраюць шчырых, вясёлых людзей.
— На гэты раз хапіла часу і на тое, каб адкрыць купальны сезон, выпрабаваць пліту адноўленай печы, — дадаў Дзіп. — Было прыемна і пасядзець ля вогнішча, паразважаць на розныя тэмы.
Па словах валанцёркі з Бярэсця Вольгі Хведчэні, Памямонцы маюць пэўную таемную прывабнасць. У іх хочацца вяртацца зноўку і зноўку.
— Мы плённа папрацавалі, смачна паелі, пазнаёміліся з цікавымі людзьмі, падзяліліся карысным досведам, — расказала аб уражаннях Вольга. — Мне асабліва спадабаліся заняткі йогай. Яны падсілкавалі цела і напоўнілі спакоем душу.
Працоўны дэсант ўзмацнілі ўдзельнікі нацыянальнага савета YMCA Беларусь. Яны не толькі абмеркавалі пытанні, важныя для арганізацыі, але і прыклалі свае рукі да аднаўлення Моладзевага цэнтра ў Панямонцах.
Аднымі з першых адчуць важнасць пераменаў змогуць 50 школьнікаў Лідскага раёна. З 15 па 21 чэрвеня ў Моладзевым цэнтры яны будуць вучыцца, весяліцца, знаёміцца адзін з адным, прапаноўваць ідэі і рэалізоўваць іх.
Напрыканцы ліпеня Панямонцы ізноў напоўняцца гулам энергічных галасоў. На на базе Моладзевага цэнтра пройдзе нацыянальны летнік «Панямонцы-2016». Яго ўдзельнікамі стануць валанцёры з розных куткоў Беларусі.
Руслан Ананьеў
